Krótke stawizny Płomjenja

„Bjez Płomjenja hižo jutře njeby było čitarjow Zejlerja a Ćišinskeho ... A ničo njeje naše dźěći tak k serbskej literaturje dowjedło kaž Płomjo.“ (Jurij Brězan)

Prěni serbski dźěćacy časopis scyła bě Raj, kiž wuchadźeše z lěta 1906, bohužel pak jenož něšto lět. Bě to skromne ale woblubowane łopjeno, kiž bu płaćene z darow jednotliwcow a serbskich towarstwow. Po lěće 1945 wuńdźechu hišće raz štyri čisła Raja.

Prěnje čisło hornjoserbskeho dźěćaceho časopisa Płomjo wuńdźe w aprylu 1952 a wuchadźeše dwójce wob měsac. Płomjo wobsahowaše tehdy tež pjeć stronow za delnjoserbske dźěći, doniž so pjeć lět pozdźišo samostatne delnjoserbske Płomje njezrodźi, kotrež dóstachu dźěći měsačnje do rukow. Časopis financowaše tehdyša młodźinska organizacija Němskeje demokratiskeje republiki.

Płomjo a Płomje měještej w lěće 1960 wjace hač 6.000 abonentow w Hornjej a Delnjej Łužicy. Na wupisanjach mytow wobdźěli so tehdy přez 2.000 šulerjow z 49 šulow.

Prěni zjězd serbskich dźěći wotmě so kónc 60tych lět w Hórkach. Naličichu na 2.200 kolesow, kiž na krasnym słónčnym dnju před Hórčan stadionom stejachu. Kolesowarjo sami pak dachu so z wulkej zahoritosću do kopańcoweho turněra, dźiwadźelenja a spěwanja.

W lěće 1971 zetka so wjace hač 1.000 serbskich dźěći ze znatym indianskim filmowym rjekom Gojko Mitićom na Łahowskim hrodźišću. Něšto lět pozdźišo bě tam podobne wulkozarjadowanje z wuznamnymi pólskimi filmowymi hrajerjemi.

Časopisomaj Płomjo a Płomje spožči so w lěće 1972 myto Ćišinskeho 1. rjadownje „Za wurjadne zasłužby při rozšěrjenju serbskeho literarneho a wuměłskeho tworjenja“.

Dźensa ma Płomjo 2.000 čitarjow w Hornjej a Płomje 1.200 čitarjow w Delnjej Łužicy.