Swjedźeń serbskeje rěče 2008 w Radworju

Na swjedźenju serbskeje rěče w Radworju

Na srjedu 24. septembra su so zawěsće hižo mnozy B-serbšćinarjo wjeselili. Na tutym dnju běchu šulerjo 4. lětnikow ze zakładnych šulow z Barta, Bošec, Bukec, Wulkeje Dubrawy, Slepoho, Radworja, Běłeho Chołmca, Kulowa a Noweje Wsy na swjedźeń serbskeje rěče přeprošeni. Dohromady zhromadźi so 112 šulerkow a šulerjow w Radworskej sportowej hali. Po zahajenju dožiwichu lóštne klankodźiwadłowe předstajenje wo Čerwjenawce, wowce a wjelku. Přizamkny so snědań, a potom dyrbjachu so dźěći rozsudźić, kotru staciju bychu chcyli wopytać. Za wšitkich wobdźělnikow bě mjenujcy dźesać wšelakich stacijow spřihotowanych. Wobdźělnicy móžachu na př. paslić, serbske spěwy spěwać a serbske reje rejować, wosebitosće narodneje drasty zeznać abo so wo Płomjenju informować. Šulerki a šulerjo so spěšnje do skupinow rozdźělichu, a kóžda skupina měješe nětko dosć časa, zo by so z dwěmaj stacijomaj bliže zeznajomniła. Kaž na wobrazach widźiće, je so dźěćom hraće, spěwanje a rejowanje jara lubiło a wšitcy běchu z wjeselom při wěcy. Na kóncu dósta kóždy hišće kołbasku a całtu, a potom so šulerjo zaso na dompuć podachu.