Zhromadna akcija ze Serbskim rozhłosom 18.12.2008

Wubědźowanje wo najsłódniše poprjancy

Ow, je to wšudźe rjenje wonjało! A kak su te poprjančki słodźeli, to sej njemóžeće předstajić! Ale nětko wot započatka:

Kaž sće wšitcy w Płomjenju čitali abo Serbskim rozhłosu słyšeli, pytachmy srjedź decembra za najsłódnišimi poprjancami. Pjeć mustwow ze zakładnych šulow je w Chróšćan šuli nastupiło, zo by po swojich receptach najlěpše poprjancy napjekło. Sym so woprawdźe dźiwał, kak wušiknje su dźěći muku wotwažili, ćěsto naměšeli a hotowe poprjančki wudebili. To njetrjebamy strach měć, zo njezmějemy w přichodźe dosć wušiknych pjekarkow a pjekarjow we Łužicy.

Dobyli su Tanja Šeferec, Jarmila Žurec a Nadja Brězanec. Woni chodźa do 4. lětnika Chróšćan šule, a njejsu docyła z prěnim městnom ličili. Čim wjetše běše wězo jich wjeselo, a tež ći druzy bychu rady zaso na tajke zarjadowanje přijěli.