Swjedźen serbskeje rěče 03.12.2008

Swjedźeń na gymnaziju w Budyšinje

Njedawno – běše to spočatk decembra – běch zaso jónu w Budyšinje po puću. Sym mjenujcy słyšał, zo je sej Serbski gymnazij šulerjow 4. lětnikow z Bošec, Hodźija, Budyšina, Barta a Huskeje na swjedźeń serbskeje rěče přeprosył.

We wulkej awli so zarjadowanje z programom tamnišeho pjateho lětnika započa. Šulerki a šulerjo su za hosći rejowali, spěwali a samo krótke skeče nazwučowali. To je so mi jara lubiło, a maja tam woprawdźe wulke talenty!

Po programje dźělichu so šulerjo do skupinow, kiž mjenowachu so „Wódny muž“ abo „Błudnički“. Po cyłej šuli běchu za skupiny dohromady štyri stacije spřihotowali. Dźěći móžachu hodowne hwězdy paslić abo eksperimenty přewjesć. Sobudźěłaćerka Serbskeho muzeja je jim adwentne a hodowne nałožki w Serbach předstajiła, a při staciji Serbskeho rozhłósa su jim rozkładli, kak přinoški za radijo nastanu. Ja sym sej jónu staciju Płomjenja dokładnišo wobhladał. Tam je so kóžda skupina hišće raz dźěliła. Ći jedni su serbsku scrabble-hru hrali, a tamnym je redaktor pokazał, kak dźěćacy časopis nastanje. To je so šulerkam a šulerjam zakładnych šulow lubiło wosebje tež tohodla, dokelž móžachu při tym małe myta dobyć.

Na kóncu su so wšitcy hišće raz w awli zhromadźili. Po wustupje małeje rejowanskeje skupiny běše swjedźeń poprawom nimo. Tola nadobo so durje wočinichu a žona w běłych drastach do awle zastupi. Běše to swjata Borbora! Wona je wšitkim wobdźělnikam dar sobu přinjesła. Tajka wulka překwapjenka! Jako dźak su dźěći swjatej Borborje spěw spěwali, a ze zhromadnej reju so swjedźeń serbskeje rěče na Budyskim gymnaziju zakónči.