RCW-camp w nazymskich prózdninach 2008

Prózdninski camp 2008

W prěnim tydźenju nazymskich prózdnin knježeše při spjatym jězoru w Bórku blisko Budyšina wulke wjeselo a zabawa. Tam přebywachu 20 serbskich a serbšćinu wuknjacych dźěći z Wojerec, Slepoho, Budyšina, Ralbic, Pančic-Kukowa, Radworja a Chrósćic.

Hižo k 7. razej přeprosy Rěčny centrum WITAJ šulerjow 3. a 4. lětnika na zhromadny prózdninski tydźeń. Spěšnje so dźěći wšelakich šulow mjezsobu zeznachu a spřećelichu. Najrjeńše dožiwjenja běchu zhromadne płuwanje w Budyskej kupjeli, wopyt zeloweje zahrody w Pančicach-Kukowje, ćišćenje swójskich T-shirtow, pječenje nowolětkow, pytanje pokłada a wječorna disco. Wjeršk tydźenja pak bě zestajenje a nazwučowanje swójskeje dźiwadłoweje hry, wopyt Dźiwadła na hrodźe, proba na porjadnym jewišću a nic naposledk předstajenje před dźěćimi w Malešanskej pěstowarni. Dny so přespěšnje minychu. Mučni ale zbožowni zapakowachu dźěći pjatk připołdnju do swojich nachribjetnikow nimo mazanych drastow tež rjane dopomnjeńki na zhromadne dožiwjenja, a tón abo tamnu adresu z přećom, so bórze zaso jónu zetkać!